जङ्गली हात्तीले पक्की घरसमेत भत्काउन थालेपछि गाउँले त्रसित
झापा । झापाको मेचीनगर नगरपालिका–१३ स्थित कालीझोडा र १५ नं वडाको ज्यामिरगढीमा जङ्गली हात्तीले पक्की घरसमेत भत्काउन थालेपछि गाउँले त्रसित बनेका छन् । हात्ती समसाँझै गाउँ पसेर घर भत्काउन, लगाएका अन्नबाली खाइदिन थालेपछि त्यस क्षेत्रका बासिन्दा रातभर नसुती जाग्राम बस्न बाध्य भएमा छन् ।
वडा नं १३ का अध्यक्ष कृष्णराज सिग्देलले हातेमालो सामुदायिक वनबाट एक्ले हात्ती साँझ पर्नासाथ गाउँ पस्ने गरेकोे र घर भत्काउन, भित्र्याइएको धान समेत खाइदिने गरेको जानकारी दिए ।
दिनभर नजिकै रहेको चिया बगानमा बस्ने र साँझ पर्नासाथ गाउँ पसेर हात्तीले पक्की घरसमेत भत्काउन थालेपछि गाउँले त्रसित बनेका छन् ।
डिभिजन वन कार्यालय झापाले हात्ती प्रभावित क्षेत्रका विद्यालय र सार्वजनिकस्थलमा हात्तीबाट जोगिने उपायका बारेमा सचेतनामूलक सन्देश लेखिएका पोस्टर टाँस्ने र जङ्गल नजिकै बासिन्दालाई टर्चलाइट बाँड्नेलगायतका काम गरेको जनाएको छ ।
कार्यालयका प्रमुख विष्णुलाल घिमिरेका अनुसार झापाका विभिन्न जङ्गलमा रहेका १३ रैथाने हात्तीले गाउँमा पसेर स्थानीयवासीलाई दुःख दिन थालेको बताए ।
२०७६ मंसिर २० गते शुक्रवार ११:३१ बजे प्रकाशित
