बाढी पहिरो र नदी तटीय क्षेत्रमा उच्च सतर्कता अपनाउन आग्रह
काठमाडौँ । बाढी पूर्वानुमान महाशाखाले देशका विभिन्न स्थानमा बाढी पहिरो र डुबानको जोेखिम रहेको जनाएको छ ।
बुधबार जारी सूचनामा मुलुकका अधिकांश स्थानमा भारी वर्षा भएसँगै विभिन्न जिल्लामा बाढी पहिरो र डुबानको जोखिम बढेको जनाइएको हो ।
राष्ट्रिय आपतकालिन उद्धार केन्द्रले बुधबार बिहान गण्डकीको चुरे र पहाडबाट बहने साना नदीमा उच्च बहावको सम्भावना रहेकोले तटीय क्षेत्रमा उच्च सतर्कता अपनाउन चेतावनी दिएको छ ।
केन्द्रले सामाजिक सञ्जाल फेसबुकमार्फत चितवन, पर्सा, बारा, मकबानपुर, नवलपरासी, पाल्पा, अर्घाखाँची, रूपन्देही, कपिलवस्तु, दाङ, बाँके, बर्दिया, कैलाली, कञ्चनपुर, झापा, मोरङ, सुनसरी लगायत प्रदेश १, २, ३, ५, गण्डकीको चुरे र पहाडबाट बहने साना नदीमा उच्च बहावको सम्भावना रहेको जनाएको छ ।
अहिले मोरङ, सुनसरी लगायत आसपासका जिल्लाहरुमा मुसलधारे वर्षा समेत भइरहेको छ ।
२०७६ साउन ८ गते बुधवार ११:१७ बजे प्रकाशित
