काठमाडौं । सरकारले भारतले अतिक्रमण गरेकाे लिम्पियाधुरा, लिपुलेक र कालापानीसहितको अध्यावधिक नयाँ नक्सा सार्वजनिक गरेको छ । भूमि व्यवस्था तथा सहकारीमन्त्री पद्मा अर्यालले बुधबार आयोजित पत्रकार सम्मेलनमार्फत नयाँ नक्शा सार्वजनिक गरेकी हुन् ।

नक्सा सार्वजनिक गर्दै मन्त्री अर्यालले आफू नक्सा सार्वजनिक गर्दै गर्दा निकै गौरवान्वित भएको बताइन् । उनले ऐतिहासिक प्रमाण र ऐतिहासिक तथ्यकै आधारमा नक्सा ल्याएको पनि बताइन् ।

‘आज मलाई अत्यन्त खुसी लागेको छ,’ उनले भनिन्, ‘यसमा आम नेपालीले देखाएको चासोप्रति आभार व्यक्त गर्न चाहन्छु । अहिलेसम्म उपलब्ध प्रमाण र ऐतिहासिक तथ्यले देखाएको सत्यको भरमा हामीले यो कदम चालेका हौँ ।’

मन्त्री अर्यालले लिम्पियाधुरासहितको नयाँ नक्सा सार्वजनिक गर्दै नयाँ नक्सालाई भारतले पनि सकारात्मक रुपले लिने विश्वास व्यक्त गरिन् । उनले छिट्टै सरकारी दस्तावेज र पाठ्यपुस्तकहरुमा पनि नयाँ नक्सा प्रचलनमा ल्याउने बताइन् ।

गत सोमबार भूमि व्यवस्था, सहकारी तथा गरिबी निवारण पद्मा अर्यालले उक्त नक्सा पेश गरेकी थिइन्। सोही दिन मन्त्रिपरिषद्ले पारित गरेको थियो।

गत जेठ २ गते सरकारले पेश गरेको नीति तथा कार्यक्रममा पनि सरकारले भारतले अतिक्रमण गरेको लिपुलेक, लिम्पियाधुरा, कालापानीलगायत भू–भाग समेटेर नयाँ नक्सा जारी गर्ने घोषणा गरेको थियो। दुई साताअघि भारतले अतिक्रमित क्षेत्रमा निर्माण गरेको भू–भागको निर्माण गरेको सडकमा रक्षामन्त्री राजनाथ सिंहले उद्घाटन गरेका थिए।

नेपालले नयाँ राजनितिक नक्सा पारित गरेसँगै नेपालको क्षेत्रफल पनि बढ्ने भएको छ। अहिलेसम्म नेपालको क्षेत्रफल १ लाख ४७ हजार १ सय ८१ वर्ग किलोमिटर छ। अबको नक्सामा ३ सय ३५ वर्ग किलोमिटर बढ्ने बताइएको छ।

२०७७ जेठ ७ गते बुधवार १५:१९ बजे प्रकाशित